I Jenseverda

Oioi, i dag har eg vore på helsestasjonen att! Det var kjempelenge sidan sist, men du kor kjekt! Eg storkosa meg allereie medan me venta eg, for det er så mange kjekke leiker på venterommet. Og helsesøster Oddbjørg høyrde gjennom døra at eg snakka som ein foss ;) Der inne sjekka Oddbjørg om eg høyrde godt - det gjorde eg du. Og så snakka ho med meg, bad meg om å gjere ulike ting og spurde kva ting heitte og kven eg leika med i barnehagen og allslags. Ho var godt nøgd med det ho fekk vite i alle fall Lege Randi kom også, dei var begge imponerte over alt eg kunne fortelje dei om, og over konsentrasjonen min med ei popp-opp-leike ;) Randi sjekka forskjellig også ho, eg likte det ikkje sånn kjempegodt alt men det gjekk heilt fint. Så vart eg vegd og målt etter gammalt - eg er no straks 93 cm. lang og veg litt over 15 kg. Finfin storleik altså!

Eigentleg ville eg ikkje gå frå helsestasjonen, men etter å ha ommøblert litt på venterommet og sagt hadet til lege, helsesøster, heimekonsulent, kontormedarbeidarar, ein lege til og dei som skulle inn til helsesøster etter oss, vart eg med ut ;)

Når eg først er her vil eg fortelje at eg storkosar meg i barnehagen! Eg går altså måndagar, tysdagar og fredagar, og det er passe. Tysdagane er møtedag for mampap på jobb, så då får dei ikkje henta meg før ca. 15:45 - dei andre dagane tek dei jobb med heim og hentar meg seinast 15:00 heldigvis. Det er ganske slitsamt å vere i barnehagen ein heil dag, sjølv om eg søv godt midt på dagen.

Eg snakkar som ein foss no forresten, det er nesten ingenting eg ikkje prøver meg på å seie. Mykje moro med det i heimen - du må nok kome på besøk for å oppleve eit liveshow ;) Eg skarrar skikkeleg kan eg røpe, og lagar setningar i vilden sky

På bildet ser du pappa og meg ute på sykkeltur like utanfor huset. Eg er ein ivrig syklist, og sparkar meg avgarde i stadig større fart. Eg har vore på to lange sykkelturar dei siste vekene, begge gongen på skogsvegen inn mot Hattavågen. Ein tur med Ruth og dei og ein med mormor og morfar - veldig kjekt! Kyr der og rådyr og gravemaskin og stein og altmulegslags kjekt!

Å pusle er også knallkjekt! Dessutan har eg flytta over i stor seng viss eg ikkje har sagt det - sidan ho først stod der på rommet mitt (eg flytta på eige rom i sommar ja, men det har eg vel fortalt) såg eg ikkje nokon grunn til å bli verande i den vesle senga.

Håpar de har det fint der ute!

Hohei!

Fort går det, og stor er eg

I går feira me toårsdagen min altså, og det var kjempekjekt! Eg var først på ein laaaaang sykkeltur, såg på kyr og sånn. Seinare fekk eg opne pakkar - mange pakkar! Og du og du, det var moro. For der var det berre fine og kjekke ting som du ser - masse duplo, litt klede, stol, sekk, sangkort, bok, hylle, ei tromme... Eg har kosa meg masse med alt dette, og skal gjere det leeeeenge framover! Så åt me god middag (pastasalat), og eg fekk vere med å lage vafler. Me la vaflene i ein høg stabel på eit fat, og så sette mamma to lys oppå der som ho tente på, og eg skulle blåse ut. Det gjekk fint med litt hjelp ;) Eg åt berre ei vaffel, så gjekk eg over på eple. Det er slitsamt å ha bursdag òg altså, så eg var supertrøtt då eg la meg.

No er eg altså 2 år. Jajaja.

Eg har begynt i barnehagen også altså. I dag var 3. dagen min, og eg var der åleine frå 8.30 til 15.00! Gjekk fiiiinfint, eg kosar meg og har mykje godt å fortelje når eg kjem heim. Det er mykje som er fint i barnehagen: dei vaksne er kjekke, dei har masse kjekke leiker både inne og ute, og så får eg god mat der. Og så søv eg ute i vogn akkurat som heime. Dei vaksne der seier at det har gått heilt flott, eg har glidd så fint inn

Utanom dette så har eg sidan sist vore med mampap på ein miniferie på Sandnes. Det var fordi tante Eva, onkel Kurt, Malin og babyen vart innvidde til misjonærteneste forrige helg. Det var veldig fint - eg fekk med meg selskapet på dagen, på kveldsmøtet på UL der sjølve innviinga var var eg tilstades, men det var i djuuuup søvn i vogna mi. Meir om dette inne hos mampap.

Ordforrådet mitt aukar kvar dag med mange ord, så det går fort altså. Eg kan røpe at det er veldig frustrerande når dei rundt meg ikkje kan skjøne kva eg meinar - av og til er det til å bli tussete av! Stort sett er eg likevel blid og glad, og heldigvis forstår folk meir og meir.

No søv eg godt - det er slitsamt med lang dag i barnehagen! Likevel ikkje så lett å få sove, for det er mykje som skal bearbeidast og sånt...

Men du - god helg!

Jada, det er det han seier. Me har nemleg vore i Hardangertun Familiepark, og der bur Mikkel. I teiknehytta teikna eg ei flott teikning som eg leverte til Mikkel, og eg vart vinnaren av dagens teiknekonkurranse! Dermed fekk eg premie frå sjølvaste Mikkel. Det syntest eg var litt skummelt, for Mikkel var så veldig stor og bustete og hadde utståande plastikkauger... Pappa måtte difor ta imot premien (ei stilig Mikkel-handdokke, som eg likar godt altså). Og då pappa spurde kva reven seier, sa eg 'Whaaaaaaaaah!', litt sånn tigerlyd. Då lo dei godt dei som jobba i parken der ;)

Det var elles veldig kjekt i parken! På bildet ser du meg ute i ein bumpebåt. Det var det første eg prøvde, og eg syntest det var heilt topp - først gjekk det mykje rundt i ring, sidan eg berre haldt rattet i ro og det tydelegvis stod i sving... Men med littegrann hjelp fann eg ut av det og kom meg rundt omkring i heile bassenget, bumpa inn i nokon andre og alt.

Elles var det veldig stilig å kjøre ulike bilar og båtar, sjå på dyra, teikne ja, kjøre kræsjbåt med pappa, sjå på det stilige i Karibia og ete god mat. Og så var det jo veldig stas å vere saman med Benjamin, Jonatan, David, tante og onkel! Eg hadde meg dessutan ein god lur i vogna mi medan me var der, og har ingenting å klage på. Sånn reint bortsett frå at eg ikkje likte store Mikkeldokker - verken den store med premien eller dei litt mindre i dokketeateret. Skummelt faktisk.

Kvelden før me var i parken bada me masse på stranda i Kinsarvik. Det var superkjekt, sjølv om det var ganske kaldt vatn. Eg bada og bada og bada, og vart kjempelei meg då me til slutt måtte gå..

Då me kom heim att på søndag kvelden stod det ei campingvogn utanfor her. Og veit du kven som budde i den? Farmor og farfar!

I går var me i Habn og bada saman med dei lengelenge. Eg bada i alle fall lengelenge, og her er det mykje varmare i vatnet også, så eg vart i grunnen aldri kald! Seinare grilla me, det var stilig! Ikkje så veldig stilig at eg ikkje fekk gå nær for å undersøke grillen, men mampap påstod det ikkje var så lurt..

I dag tidleg reiste farmor og farfar til Sandnes, og dit skal me også straks reise. Me skal nemleg i selskap på fredag, eit selskap for tante, onkel og Malin som straks skal reise til Bolivia. Det vert nok eit kjekt selskap, eg er meir usikker på kor kjekt det er at dei skal reise. Eg skjønar det ikkje heilt i grunnen, men mampap seier det er litt trist. Samtidig er det jo veldig fint, for ungane og dei vaksne i Bolivia må jo få høyre om Jesus, sånn som eg får!

Bading har det blitt i dag også, i tillegg til mykje jobbing for meg - eg har maska mykje med klesvask og hjelpt mampap veldig. Og så har me flytta! I natt søv eg på rommet i kjellaren faktisk, på eige rom for første gong! Mampap skal sove i det andre rommet i kjellaren då, og med dørane opne vert jo ikkje avstanden så stor, heldigvis. Det har vore veldig vanskeleg å sove i det siste, på det varme soverommet vårt, så dette var nok smart. Fint rom eg har i alle fall - viss du kjem på besøk kan du få låne det, for det er kombinert mitt rom og gjesterom ;)

Eg snakka forresten med Gerd på stranda i dag, ho spurde om eg var klar for å byrje i barnehagen (ho er avd.leiar der), og til det svara eg eit engasjert JAAA! Og det er eg nok. Eg skal nok byrje så smått i veka som kjem sikkert, då er det jo få ungar og få vaksne, men i veka etter der er det fleire. Men då er barnehagen stengt på torsdag og fredag, når mampap skal på planlegging, så då vert det berre to dagar for meg. Spanande tider i alle fall!

Hade!

Heihei!

Etter Lyngdalturen har me for ein stor del vore her i Erfjord og nytt ferien. Små og store ting å fortelje om:

- Mykje sykling! Bildet her er ikkje sånn knallgodt, men følte eg måtte vise fram den kule sykkelen min... ;) Eg har hatt han ganske lenge altså, men trur ikkje eg har vist han fram her før? Det er ein løpesykkel, noko som betyr at ein spring fart på han. For min del så går eg helst fart på han førebels, men farten er ganske så god til tider altså! Eg likar veldig godt å sykle, og berre i dag har eg vore på tre lange sykkelturar. Eg tek initiativet sjølv, ved å finne fram sykkelhjelmen og ta han på ;)

- Besøk av mummu og DEN mummen (mormor og morfar). Veldig stas kan eg røpe!

- Møte ombord i Elieser. Det er altså ein båt, og det var veldig stilig. Hadde det ikkje vore for Elieser, hadde eg ikkje vore til faktisk - så kan de jo lure på korleis det heng saman.. ;) Me fekk berre med oss eit av møta der me, sidan dei byrja så seint (19:30) - for det var jo ikkje som i Lyngdal at det berre var ein bitteliten trasketur heim for å legge meg når eg vart trøtt... Men ein dag eg hadde hatt ein lang og sein middagslur gjekk det bra, og eg kosa meg ombord - fekk ein plastkopp med eplebåtar hos mampap og vandra rundt. Eplebåtane fekk nok ein del Elieser-basseluskar på seg etter mykje nærkontakt med golvteppet, men var uansett gode... ;)

- Masse jobbing. Pappa og eg har f.eks. klipt ned mange kvadratmeter med geitrams (altså, eg fekk sjølvsagt ikkje klippe, men eg tok det som pappa klipte og kasta det i grøfta!), og eg er gjerne med på luking, spyling, klesvask og sånt sjølvsagt, vindaugsvask og kva det måtte vere.

- I går var me på tur til Haugesund. Eg kosa meg veldig, det var mykje å sjå og høyre og vere med på. Me åt middag ute, nede på kaia med super utsikt over båtar og allslags i Smedasundet - kjempestas. Der fekk eg teiknesaker hos ho som serverte, det likte eg godt kan eg love. Det fekk eg forresten på Fargeriet på Sand også, då me åt middag der ein dag i forrige veke. (Då sette eg forresten til livs ein ganske så stor porsjon komlemiddag ;) )

- Eg snakkar massemassemasse og lærer fleire nye ord kvar dag. Mitt eige namn synest eg imidlertid er litt vanskeleg, og det vert ofte litt bakvendt - Nej eller Nejs.

- Teikning er i skotet - eg storkosar meg og kan sitje lenge med ark og fargar. Eg brukar mange og sterke fargar, og likar godt når mampap heng arbeida mine opp

Det er deilig å feriere i sommarsola her i Erfjord (med sandstrand berre eit steinkast frå utedøra!), og om berre få dagar reiser me på ein aldri så liten tur til Kinsarvik. Der skal me treffe Benjamin og Jonatan og gjengen og besøke Familieparken og greier - vert stas!

God sommar vidare!